بهذه الطريقة فقط تعرف الفرق بين الجوال الأصلي والتقليد

بهذه الطريقة فقط تعرف الفرق بين الجوال الأصلي والتقليد

الفرق بين الجوال الاصلي والتقليد
الفرق بين الجوال الاصلي والتقليد

25 نيسان / أبريل 2018

مع انتشار عدد كبير من الجوالات وظهور موديلات مختلفة، ووجود تفاوت كبير في الأسعار والإمكانيات بين تلك الموديلات، نشهد انتشار  ظاهرة سيئة بين عدد كبير من البائعين وهي ظاهرة الهواتف الذكية المقلدة أو المزورة والتي تباع على إنها أصلية، مع إغراء المشترين بتخفيض سعرها بشكل كبير لتقبل عليها الناس.

الظاهرة دي انتشرت في كتير من دول العالم، وفي المنطقة العربية ومصر، ووصلت لنا كتير من الأسئلة عاوزه تعرف طرق عملية وسهلة للتفرقة بين الموبايل الأصلي والمقلد، علشان مفيش ناس كتير تروح ضحية عمليات النصب والاحتيال اللي بتحصل.

في الموضوع هنتعرف على بعض التجارب اللي وقع أصحابها فعلًا ضحية لنصابين، وهنتعرف إزاي نفرّق بين الموبايل الأصلي والتقليد. سواء قبل فتح الموبايل أو بعد فتح العلبة الخاصة بيه.

 

تجارب المستخدمين مع موبايلات مقلدة

في البداية بتحكي لنا رنا، إزاي اتعرضت لمحاولة للنصب عليها من محل شهير في إحدى الدول العربية، واللي كانت هتشتري منها موبايل أيفون 6 حديث، لكنها اكتشفت قبل إتمام عملية البيع بوقت قليل اختلاف شكل العلبة الخارجية عن شكل العلبة الأصلية على الموقع الرسمي لشركة أبل. الأمر اللي خلاها تشك وتتوقف عن الشراء وتنقذ نفسها من شراء موبايل مقلد.
لكن على العكس من حظ رنا الكويس، محمد حسن كان حظه أسوأ لما اشترى موبايل سامسونج من محل في إحدى المولات المشهورة بالتجارة في الموبايلات، ثم اكتشف بعد حدوث عطل في الموبايل وذهابه للضمان إن الموبايل مش أصلي والضمان مش معترف به، وللأسف فشل محمد في إرجاع الموبايل بسبب مماطلة ومجادلة العاملين في المكان.
سارة الجمل كانت واحدة من اللي حظهم كويس، لأنها قدرت ترجع موبايلها بصعوبة بعد اكتشافها إنه مزور، بعد وقت قليل من شراء الموبايل من خلال مقارنة مواصفات الموبايل بالمواصفات الرسمية المنشورة على موقع الموبايل (ماركة هواوي)، لكن سارة قدرت ترجع الفلوس اللي دفعتها في الموبايل بعد مشادات ومجادلات.
تجربة تانية مع أيفون بيحكيها لنا عبد المجيد راشد، واللي أغراه إعلان عن أيفون 8 بتخفيض كبير في السعر على الرغم من إن الأيفون 8 لسه نازل جديد نسبيًا في الأسواق، لكن مع فحص الموبايل بدقة اكتشف إن ظهر الموبايل من البلاستيك مش من الزجاج على العكس من الإصدار الأصلي ورفض في النهاية شراء الموبايل.
والمواقف دي مش بتحصل في المنطقة العربية فقط، لكن في كتير من الدول والعواصم العالمية كمان، وكلنا فاكرين واقعة شهيرة حصلت في أمريكا لما اشترت سيدة موبايل أيفون ذكي مقابل ١٠٠ دولار فقط في تخفيضات الجمعة السوداء Black Friday ثم اكتشفت في النهاية أن البائع أعطاها قطع بطاطس داخل علبة أيفون حقيقية!

قبل فتح الموبايل، إزاي تفرق بين الأصلي والتقليد؟

كتير من الناس بتكون مهتمة بمعرفة طريقة التفرقة بين الموبايل الأصلي والتقليد قبل فتح الموبايل، ولو حظكم كويس الشخص أو الشركة المُزيفة هيفوتها بعض التفاصيل اللي لازم تركزوا فيها كويس جدًا، علشان ما تقعوش في فخ النسخ المزيفة من الهواتف الذكية.

اعرف شكل الموبايل كويس

من الأمور المهمة اللي لازم تاخد بالك منها كويس هي مواصفات الموبايل الخارجية، زي شكل العلبة من الخارج أو الطباعة الموجودة عليها ولون العلبة وأبعادها، علشان أي تغير في المواصفات دي حتى لو كان طفيف بيكون واحدة من أهم العلامات اللي ممكن تعرف من خلالها إن الموبايل مزيف ولا لا. علشان كده بننصح بالدخول على الإنترنت ومراجعة الموبايل من الموقع الرسمي الخاص به والتأكد من إنه بالفعل شكل العلبة وأبعادها والكتابة عليها هي نفس المواصفات اللي هتشوفها بعينك على علبة الموبايل.
كمان من العلامات اللي ممكن من خلالها تعرف الفوارق بين الموبايلات المزيفة والحقيقية هي الطباعة أو اللوجو اللي بيكون على علبة الموبايل واللي بيكون مكتوب بشكل مطفي أو كجزء من العلبة. في معظم الموبايلات المزيفة الطباعة دي بتكون بارزة أو لامعة بشكل مختلف عن العلبة، ودي علامة كويسة ممكن تكتشف من خلالها الفرق بين الأصلي والمزيف، لكنها للأسف مش بتنطبق على كل أنواع الموبايلات.

اعرف مواصفات الموبايل

من المهم إنك تعرف مواصفات الموبايل كويس، زي الأبعاد والوزن والبطارية وسعتها ونظام التشغيل. وكل التفاصيل دي لو مكتوبة على العلبة لازم تراجعها كويس وتتأكد إنها مطابقة للمواصفات الأصلية الموجودة على موقع الشركة المنتجة للموبايل.
ومن خلال مقارنة المواصفات المكتوبة على الموقع الرسمي بالمكتوبة على علبة الموبايل تقدر تميز بسهولة أي تغيير أو تلاعب في مواصفات الموبايل.

التلاعب في أسماء الماركات

بعض الشركات بتتلاعب في أسماء الماركات الشهيرة، علشان تعطي انطباع للمستخدمين إنها أصلية، يعني على سبيل المثال بدل ما تكتب Samsungعلى العلبة الخاصة بالموبايل بيتكتب Samsong مثلًا، أو أي تحريف تاني لاأسم، وبكده بتكون الماركة اتغيرت وكتير من المستخدمين مش بيعرفوا الفرق أو مش بيلاحظوا الاختلاف في الاسم، وبيترتب عليه شرائهم لموبايل رخيص وغير أصلي بسعر الموبايل الأصلي.

بعد فتح علبة الموبايل، إزاي تميز بين الأصلي والمزيف؟

أما بعد شراء الموبايل ولو شكيت إذا كان الموبايل مزيف ولا لأ، بعض العلامات ممكن تخليك تعرف الفرق بين الموبايل الأصلي والمزيف، وعلى الرغم من الحيل والخدع اللي بتتطور يوم بعد يوم في عالم تزوير الهواتف الذكية أو بيع أنواع صينية مش معروفة على إنها ماركات عالمية، لكن بعض التفاصيل الصغيرة ممكن تفرق. وتوضح لنا الفرق بين الموبايل المزيف والأصلي.

الرقم المتسلسل Serial number

كل موبايل أصلي بيكون معاه رقم متسلسل أو Serial Number بيميز كل قطعة من قطع الهواتف اللي بيتم بيعها عن بعضها البعض حتى مع تشابه الموديلات أو المواصفات الداخلية، لكن الموبايلات الغير أصلية مش بيكون لها رقم متسلسل أو بيكون معاها رقم متسلسل مضروب، علشان كده ممكن نتصل برقم *#06# علشان نعرف الرقم المتسلسل للموبايل ونتأكد إنه بالفعل رقم صحيح. وفي الغالب لو الموبايل مزيف هيكون فيه اختلاف بين الرقم المتسلسل الظاهر على شاشة الموبايل وبين الرقم المكتوب على العلبة أو البطارية أو على الموبايل نفسه.

التصميم الخارجي للهاتف

من الأمور المهمة برضه إنك تشوف فيديوهات وصور واضحة للموبايل من جميع الجوانب من خلال الموقع الرسمي للشركة المنتجة للموبايل الذكي، أو من قناتهم الرسمية على يوتيوب، ومقارنتها بالموبايل اللي تم شراءه، ولو كان الموبايل مزور بيكون فيه اختلاف واضح في حجم وأماكن الأزرار ومستشعرات البصمة – لو كانت موجودة – وغيرها من الأمور اللي بتشكل التصميم الخارجي للموبايل. ومن هنا ممكن نعرف الفرق بين الموبايل المزيف والأصلي.
كمان لازم ناخد بالنا من كفاءة الشاشة وقدرتها على عرض الألوان، ومواد صناعة الموبايل، وجودة الصورة اللي بيتم التقاطها بالكاميرا، كل الحاجات دي ممكن تعرفنا الفرق بين الموبايل المزيف والأصلي، لأن الموبايل المزيف بتكون كفاءة الشاشة والكاميرا قليلة، وعرض الشاشة للألوان بيكون أقل وأسوأ بكتير من الموبايل الأصلي، خاصة الموبايلات الذكية المشهورة وصاحبة الإمكانيات العالية والمميزة.
آخر نقطة هنقولها في الجزء ده هي ضرورة التأكد من نظام التشغيل الخاص بالموبايل. ومعظم الموبايلات المزيفة بتيجي مع نظام تشغيل غير أصلي أو ملعوب فيه أو غير نظام التشغيل المكتوب في مواصفات الموبايل الموجودة على الموقع الرسمي للموبايل. كمان لو كان الموبايل مش بيقبل التحديث لأحدث نظام تشغيل – حسب مواصفات الموبايل – دي بتكون علامة مهمة على إنه مزيف، وطبعا لو نظام التشغيل مختلف تمامًا، زي إنك تشتري أيفون وتكتشف إنه شغال بنظام أندرويد ده دليل على أن الموبايل مزيف بنسبة ١٠٠٪!

 

 

الوقاية خير من العلاج

وعلشان دايمًا تجنب النصب بيكون أفضل من تعلم كيفية التغلب على آثاره الجانبية، بيستحسن من البداية إننا نقوم ببعض الخطوات المبدئية اللي تخلينا واثقين بشكل أكبر من إننا بنشتري الموبايل الأصلي. علشان كده هنختصر لكم بعض النصائح الهامة اللي تضمن إنك بتشتري الموبايل الأصلي من البداية.

حاول تشتري الموبايل من مراكز البيع المعتمدة والمكتوبة في الموقع الرسمي لشركة الموبايل الذكي. لضمان إنك بتشتري الموبايل الأصلي من البداية.
بعض عروض التخفيضات الكبيرة في الأسعار بيكون ورائها بيع هواتف غير أصلية أو مزيفة، خصوصًا لو عروض غير منطقية زي خصم أكتر من ٥٠٪ مثلًا. بلاش تنخدعوا بالرغبة في التوفير وحاولوا تختاروا العروض المنطقية.
بعض الأماكن بتستغل فترات العروض والتنزيلات علشان تقدم تخفيضات كبيرة تجذب المشترين لها، لكن في المقابل بتكون الموبايلات غير أصلية أو مزيفة، بالتالي لازم لا نندفع وراء التخفيضات الكبيرة قبل ما نفهم سبب التخفيضات وأنها تكون منطقية ومن جهات موثوقة.
بعض المحلات في بعض المناطق أو المولات المتخصصة في بيع الموبايلات الذكية بتحترف تزوير وبيع الهواتف المزيفة، علشان كده ممكن تسألوا عن سمعة المحل قبل الشراء من خلال الإنترنت. وممكن تستعملوا جروب ياقوطة على موقع فيس بوك علشان تسألوا عن أي شيء تحبوا تعرفوا عنه.
بعض الأماكن ليها سمعة غير طيبة في مجال الموبايلات المزيفة أو العروض الوهمية بشكل عام، زي بعض المحلات مجهولة الاسم في وسط البلد أو بعض المولات المتخصصة في المنتجات التكنولوجية بشكل عام والموبايلات الذكية بشكل خاص.
واحنا بنشتري لازم نركز في أسم الماركة والموديل وشكل العلبة الخارجية وباقي التفاصيل الخاصة بالموبايل ولازم نشوف أكتر من فيديو عن الموبايل وخصائصه ومواصفاته والعلبة وباقي التفاصيل، ولازم تكون من الموقع الرسمي للموبايل.
لو هتشتري موبايل ذكي مستعمل لازم تركز كويس جدًا أثناء الشراء وتعاين الموبايل كويس قبل دفع الفلوس، وممكن تروح لمركز معتمد علشان يكشف على الموبايل كويس من الخبراء قبل إتمام عملية الشراء لإن بواقع الحال عمليات الاحتيال في مبيعات الموبايلات المستعملة بتكون أكتر من الموبايلات الجديدة.
لو بتشتري أونلاين حاول تشتري من المواقع والمتاجر المعروفة والمشهورة، وبلاش تنجرف وراء التخفيضات اللي بتعلن عنها مواقع غير موثوقة أو تجار مش معروفين. وممكن تستعين بمحرك بحث ياقوطة علشان تقارن الأسعار من متاجر مؤكدة وموثوقة.

وفي النهاية بنختصر لكم كل المعلومات اللي في موضوعنا علشان نقدم لكم الخلاصة

قبل قرار الشراء

قبل فتح العلبة

بعد فتح العلبة

يستحسن تشتري من متجر رسمي حسب ماركة الموبايل.
بلاش تنجرف وراء التخفيضات الكبيرة.
احذر من شراء المستعمل.
أسأل عن سمعة المكان اللي هتشتري منه.
اشتري أونلاين من مواقع موثوقة.
اقرأ مواصفات الموبايل وشكل العلبة كويس جدًا قبل الشراء.

تأكد من مطابقة شكل علبة الموبايل للشكل على الموقع الرسمي للموبايل.
ركز في اسم الموديل وإنه مكتوب صح وشكل الكتابة على العلبة مطابقة لأسم الماركة.
قارن جودة الإكسسوارات والشواحن والسماعات مع جودة القطع الأصلية
اتأكد من مطابقة المواصفات المكتوبة مع المعلن عنها في موقع الموبايل.

اتأكد من صحة الرقم المتسلسل للموبايل ومطابقته للمكتوب على العلبة.
قارن جودة الكاميرا والشاشة بجودة المنتجات الأصلية.
راقب أي تغير في شكل الزراير وأماكنها على الموبايل.
قارن نظام التشغيل على الموبايل بالمكتوب على العلبة والمعلن من شركة المحمول.